Cum dolor temporum spacio jam mitior renovatur, refricari cicatrix dicitur. Notum unde ducta metaphora. Nempe a corporali vulnere, quo jam coiit cicatrice obductum. Quae si frictu denuo aperiatur, recrudescit vulneris pristini dolor. Cicero ad Atticum : Appii vulnera non refrico. Idem in Rullum : Ne aut refricare obductam reipublicae cicatricem viderer. Idem refricare dolorem dixit libro De oratore secundo. Dicimus et refricare memoriam et suffricare memoriam pro eo, quod est leviter renovare, sed in malam fere partem.