Τὰ ὑπὲρ ἡμᾶς, οὐδὲν πρὸς ἡμᾶς, id est Quae supra nos, nihil ad nos. Dictum Socraticum deterrens a curiosa vestigatione rerum coelestium et arcanorum naturae. Refertur proverbii vice a Lactantio libro tertio, capite vicesimo. Ex his, inquit, unum eligam, quod ab omnibus sit probatum. Celebre hoc proverbium Socrates habuit : Quod supra nos, nihil ad nos. Torqueri potest et in illos, qui de negotiis principum aut theologiae mysteriis temere loquuntur. Vertere licebit et in contrarium : Quae infra nos, nihil ad nos, ubi significamus res leviusculas, quam ut nobis curae esse debeant.