Ἐκ τοῦ λέγειν τὸ λέγειν πορίζεται, id est Dicendo consequimur ut dicamus. Syrianus, Hermogenis interpres, Evagoram sophistam taxat, qui dicendi facultatem non putarit ratione, sed usu dumtaxat constare fierique ut dicendo consequeremur dicendi facultatem. Ἀξιοῦντος δὲ, inquit, κατὰ τὴν συρφετὴν παροιμίαν τὸ λέγειν ἐκ τοῦ λέγειν πορίζεσθαι, id est Existimantis juxta vulgare proverbium dicendi facultatem dicendo contingere. Usurpavit et M. Tullius libro primo De oratore. In quo, inquit, fallit eos, quod audierunt dicendo homines ut dicant efficere solere. Verum etiam illud dicitur perverse dicere homines perverse dicendo facillime consequi. Plinius libro Epistolarum VI : Video etiam multos parvo ingenio literis nullis ut bene agerent agendo consecutos. Latius autem patet adagium nempe ad cujusvis rei peritiam, quam potissimum usus suppeditat, optimus rerum omnium magister. Proinde proverbiales erunt omneis id genus : fabricando fabricam disces, canendo musicam, militando militarem artem, scribendo disces scribere.