Pari jugo dixit Plinius in Epistolis pro eo, quod est pari studio parique conatu. Quadrabit in eos, qui negotium commune certatim ac simili contentione agunt. Translatum a bubus idem plaustrum aequali jugo trahentibus. Plinii verba sunt haec : Habet quidem gloria in studiis praesertim quiddam ἀκοινώνητον; nobis tamen nullum certamen nulla contentio, cum uterque pari jugo non pro se, sed pro causa niteretur. Theocritus in Aita :
id estἈλλήλους δ᾿ ἐφίλησαν ἴσῳ ζυγῷ,
de amore mutuo et aequali, quem Graeci vocant ἰσόρροπον. Huic finitima sunt, quae scribit divus Hieronymus ad Augustinum : Romae dicuntur esse quam plurimi, qui possint et audeant tecum congredi et in disputatione sanctarum scripturarum jugum ex aequo ducere. Extat et Graecis proverbium :Parique jugo sese invicem amabant,
id estἘγώ τε καὶ σὺ ταὐτὸν ἕλκομεν ζυγόν,
Quod suo referemus loco.Idem egoque tuque ducimus simul jugum.