I. 5. Utinam mihi contingant ea,. xcviii

quae sunt inter Corinthum et Sicyonem

Eustathius, enarrans Iliados secundum librum ait hunc versum olim proverbio fuisse celebratum :

Εἴη μοι τὰ μεταξὺ Κορίνθου καὶ Σικυῶνος,

id est

Sit mihi quod Sicyonem interjacet atque Corinthum.

Id inde venit in adagium, quod urbs utraque esset opulentissima agrique longe feracissimi interjacerent. Aristophanes in Avibus indicat ex oraculo natum :

Ἀλλ᾿ ὅταν οἰκήσωσι λύκοι πολιαί τε κορῶναι

Ἐν ταὐτῷ τὸ μεταξὺ Κορίνθου καὶ Σικυῶνος,

id est

Cornix cana lupusque ubi eadem sede morantes,

Quod spacium Sicyonem dirimit atque Corinthum.

Interpres adscribit Aesopo consulenti de parandis opibus, ita responsum fuisse :

Εἰ τὸ μέσον κτήσαιο Κορίνθου καὶ Σικυῶνος,

id est

Si teneas quod agri Sicyonem interque Corinthum est.

Refertur et a Zenodoto atque item Athenaeo libro Dipnosophistarum quinto. Conveniet ubi quis optat ingentia. Poterit et per jocum torqueri in eum, qui quod assequi non potest, id votis tamen quasi somniat. Simili figura dictum est illud Theocriti in Ergatinis :

Αἴθε μοι ἦσαν ὅσα Κροῖσόν ποκα φαντὶ πεπᾶσθαι,

id est

.

Quae Croesum tenuisse ferunt, utinam illa mihi sint.

Index Adagiorum