Confine est superioribus = Ad. 476, 477 : Cantherius in porta. Natum a Sulpicio Galba quodam, cui cum in provinciam exituro cantherius in porta cecidisset : Rideo, inquit, cantheri, in porta, cum tam longum iter sis iturus, jam lassum esse te, cum vixdum sis ingressus. Quod dictum in proverbium abiit. Refertur adagium a Festo Pompeio in dictione Rideo atque is indicat convenire, cum quis in principio rei vix inchoatae deficit animo. Quid autem sit cantherius dilucide exponit, nempe equus exectis testibus, ut hoc differat cantherius ab equo, quo majalis a verre, capus a gallo, vervex ab ariete.