Adagiorum Chiliades

I. 5Risus Megaricus.lxx

Megaricus ri. Risus Γέλως Μεγαρικός id est Risus Megaricus. In eos dicendum qui parum tempestive jocantur, quique (quod vetat Quintilianus) [Inst., VI, 3, 28] malunt aliquoties amicum quam dictum perdere ; aut quorum artes jam in contemptum abierunt successione majorum artificum obscuratae. Neque male quadrabit in senes qui, aetate aliena, lusus quosdam indecoros ac voluptates juveniles turpiter consectantur. Nam Ionica comoedia viguit ad tempus, deinde in contemptum venit irrisa ab Atheniensibus. De risu intempestivo celebratur et hic senarius :

Γέλως ἄκαιρος ἐν βροτοῖς δεινὸν κακόν,

id est

Non in loco ridere pergrave est malum.