E nevo cognoscere est ex re quapiam minima totum hominis ingenium aestimare, quemadmodum dicimus leonem ex unguibus agnoscere et Protogenes e linea agnovit Apellem. M. Tullius in libro De claris oratoribus : Nunc quoniam totum me non e nevo aliquo aut crepundiis, sed corpore omni videris velle cognoscere, complectar nonnulla etiam quae fortasse videantur minus necessaria. Metaphora sumpta est ab iis qui infantibus quos ablegant exponuntve addunt crepundia per quae agnoscantur, si forte inciderit occasio, aut nevum aliquem in corpore notant parentes. Tale signum interdum syngraphis suis addunt trapezitae.