Superius ex Aristotele docuimus virum constantis animi appellari tetragonum, quod ea figura ex omni parte sui similis est. Unde quicquid congruit et aptum est quadrare dicitur. Id M. Tullius in Oratore deflexit ad orationem concinnam et aptis numeris compositam : Itaque postquam est nata haec circumscriptio vel comprehensio vel continuatio vel ambitus, si ita licet dicere, nemo qui aliquo esset in numero scripsit orationem generis ejus quod esset ad delectationem comparatum remotumque a judiciis forensique certamine, quin redigeret omneis fere in quadrum numerumque sententias. Metaphora ducta est a marmorariis. Non sum immemor hoc a nobis alibi positum, sed locum evidentius ostendere volui. Illic enim tantum indicaram.