V. 2. Bene natis turpe male vivere. xxxiv

Quidam arbitrantur ob hoc ipsum sibi licere turpiter vivere quod honestis majoribus orti sunt, cum contra generis claritas quasi fax addita faciat ut nobilium errata plus habeant dedecoris quam obscuro genere natorum. Hoc in eadem fabula sic expressit Electra :

Ζῆν αἰσχρὸν αἰσχρῶς τοῖς καλῶς πεφυκόσι,

id est

Natis honeste turpe vivere turpiter.

Quanquam Electra putat eos turpiter vivere, non qui sunt improbis moribus, sed qui vivunt in servitute, cum sint ingenui nati, ut cum illo conveniat Ubi non sis qui fueris, non est cur velis vivere.