Quaedam voces ob hoc ipsum habent proverbii gratiam quod sint vel obsoletae vel alicui professioni peculiares, veluti prisci jureconsulti herciscere dicebant hereditatem dividere. Inde apud jureconsultos actio herciscundae familiae. Porro familiae vox omnem hereditatem ac res hereditarias complectitur. Haec actio nata est e Duodecim Tabulis, quarum haec verba recitantur in Codice : Cohaeredes a communione discedere volentes agunto. Id si transferatur ad alterius rei divisionem, erit proverbiale, veluti si quis dicat inter Guilhelmum Budaeum et Leonardum Portium de assis inventione concertantes Janum Lascarem datum herciscundae gloriae arbitrum. Et hoc seculo nonnulli monachi rem prius communem inter se non dubitarunt herciscere idque sine praetore.