Ἀρχιλόχου μέλος id est Archilochi cantio, dicebatur hymnus qui ad multos poterat accommodari, qualem ferunt Archilocho fuisse repertum, qui fuerit ante Pindarum et alios hoc genus lyricos qui singulos propriis laudibus exornabant. Archilochi carmen erat idem in omneis. Quod cithara canebatur. Citharoedus tantum ad singula cantionis intervalla victorum nomina voce sua repetabat, veluti si Herculem laudabat, accinebat : Tenella callinice χαῖρ᾿ ἄναξ Ἡράκλεις aut aliud, si quem alium canebat. Huic non dissimile est quod refert Horatius de pictore qui depicta cupresso nautam rogabat ecquid vellet addi. Quadrabit in rem priscam ac rudem. Meminit Aristophanis et Pindari interpres. Sumptum est e Pindari Olympiorum encomio septimo : Τὸ μὲν Ἀρχιλόχου μέλος φωνᾶεν Ὀλυμπίᾳ ‚ καλλίνικος. Quo quidem loco varia commenta refert enarrator, quae repetere non videtur ad hoc quod agimus necessarium.