Adagiorum Chiliades

V. 1.Gralatorius aut testudineus gradus.xxii

Plautus in Amphitryone : Blep.

Non potuimus nostros grandius grandire gradus.

Amphi.

Sive gralatorius sive testudineus fuerit, certum est mihi

Hunc scelestum perdere.

[Amph.] Item in Poenulo :

Vinceretis cervum cursu, gralatorem gradu.

[Poen.] Gralae dicuntur fustes quibus innixi quidam ingrediuntur quos gralatores appellavit antiquitas. Graecis καλοβάται dicuntur, quemadmodum schoenobatae vocantur funambuli. Illi fustes quo sunt longiores a gradu cui pes innititur, hoc gradus sunt majores. Tantum elicere licuit e corruptissimo loco apud Nonium, praesertim in aeditione Aldina. Idem Plautus in Menaechmis :

Atque eccum incedit. Move formicinum gradum.

[Menaech.] Formicae videntur currere, cum minimum promoveant. Rursus in Poenulo :

Vicistis cochleam tarditudine.

[Poen.] In eadem tardos appellat spissigradissimos et

Tardiores quam sint corbitae in tranquillo mari.

[Poen.] Rursus talium gradum dicit esse succretum cribro pollinario quod simila per angusta foramina paulatim defluat.