In eadem ita loquitur mercator :
Non sine proverbii specie dictum est pro atrocibus ac superbissimis minis. Versus patitur ut pro Aeacidinis legatur Aeacinis — nam id nonnulli divinant — sed probabilius est poetam sentire de Achille, Aeaci nepote, quem Homerus ubique facit stomachabundum ac minabundum, velut in primo statim Iliados libro, ubi sic incandescit in Agamemnonem ut manum admoveat capulo, a conviciis ad pugnas venturus, nisi Pallas eum capillis revocasset. Quin et ipsum opus ab Achillis ira habet exordium : Μῆνιν ἄειδε, θεά. Quod quidam adferunt de Aeaco manium judice non video quid ad hunc faciat locum. Quicquid etiam invictum et insuperabile volumus intelligi Achilleum dicimus.Siquidem hercle Aeacidinis minis animisque expletus incedit.
Iratus si me tetigerit, iratus vapulabit.