Adagiorum Chiliades

IV. 10Jovis germen.lxxxvi

Ἐκ Διὸς ἔρνος, id est ex Jove germen dicebatur insigni virtute praeditus. Verba sunt pastoris ad pastorem musices pulchre peritum, cui honoris gratia clavam dono dedit. Clava autem gestamen est Herculis ex Jove prognati. Observatum est a priscis, a poetis Jovis filios semper induci civiles et humanos, contra Neptuni truces et asperos. Musica autem civilitatis magistra est. Carmen sic habet :

Οὕνεκεν ἐσσί

Πᾶν ἐπ᾿ ἀληθείᾳ πεπλασμένον ἐκ Διὸς ἔρνος,

[Idyll., 7, 43] id est

Es siquidem tu

Revera factum ac prognatum ipso ex Jove germen.

Interpres tamen mavult eo referre quod qui vera loquuntur ex Jove prognati dicuntur, adducens carmen Homericum :

Οὐ γὰρ ἐμὸν παλινάγρετον οὐδ᾿ ἀπατηλόν, ὅττικεν κεφαλῇ κατανεύσω,

[Il., I, 526] id est

Haud etenim fallax erit aut revocabile quicquam

Quod capite annuero.

Pastor ob id laudatur quod ingenue profiteatur se non conferendum cum insignibus musicis, qualis inducitur et a Marone :

Me quoque dicunt

[Buc., 9, 33] Vatem pastores, sed non ego credulus illis.