IV. 10. Talia gignit bellum. lxviii

Senarium hunc M. Tullius Epistolarum ad Qu. fratrem libro II ceu vulgo jactatum adducit :

Τοιαῦθ᾿ ὁ τλήμων πόλεμος ἐξεργάζεται,

id est

Similia bellum calamitosum perficit,

sentiens e dissidiis eorum qui rempublicam administrant multa gigni absurda. Verba Ciceronis sic habent : Summum otium forense, sed senescentis magis civitatis quam acquiescentis. Sententia autem mea in senatu ejusmodi magis ut alii nobis assentiantur quam nosmetipsi. Τοιαῦθ᾿ ὁ τλήμων πόλεμος ἐξεργάζεται. Id translatum ad privatam discordiam plusculum habebit gratiae.