Adagiorum Chiliades

IV. 10Ex phelleo.xxiii

Ἐκ φελλέως ἐλθεῖν, id est ex phelleo venire, dicebantur qui ex humili fortuna asperaque vita ad dignitatem emersissent. Nam Graecis φελλεύς dicitur locus aptus pascendis capris, asper, pumicosus ac sterilis. Nam hujusmodi pascuis caprae delectantur. Aristophanes in Nebulis :

Ὅταν μὲν οὖν τὰς αἶγας ἐκ τοῦ φελλέως,

Ὥσπερ ὁ πατήρ σου, διφθέραν ἐνημμένος.

[Nub.] Est hujus nominis locus Atticae montanus ac petricosus, cujus meminit et Stephanus, nisi quod montem Φελλάς; vocat, fortassis scriptura mendosa. [Ethn., Meineke p. 661 « Φελλεύς »] De his nonnihil attigimus in proverbiis Subere levior et Phellinas.