Cum exitiabile bellum significamus, ferro flammaque rem geri dicimus sive ferro ignique. M. Tullius in oratione Pro L. Flacco : O dii immortales, quid hoc miserius ? Nos qui P. Lentulo ferrum et flammam de manibus extorsimus, imperitae multitudinis judicio confidimus. Mox in eadem : O nox illa quae poene aeternas huic urbi tenebras attulisti, cum Galli ad bellum, Catilina ad urbem, conjurati ad ferrum et flammam vocabantur. Rursum Pro Sylla : Cujus nuper ferrum retuderim flammamque restinxerim. In oratione Pro domo sua addit saxa : Deinde, cum ille saxis et ignibus et ferro vastitatem meis aedibus intulisset. Item Pro Planco : Quorum vidisti toto illo anno ferrum in foro, flammam in aedibus, vim in tota urbe versari.