Διακωδωνίζειν Demosthenes dixit pro explorare atque examinare. Sumptum putant ab iis qui noctu cum tintinabulo circumeunt excubias, ne quis dormiat aut ut hoc signo declarent se vigilare, sive ab iis qui coturnices tintinnabulo experiuntur, num sint ad pugnam idoneae, ut visum est Aristarcho. Nec desunt qui malint inde ductum, quod ad eundem modum explorari soleant equi, an tubarum et armorum strepitum laturi sint. Simili modo conviciis olim explorabantur initiandi mysteriis, cujus consuetudinis vestigium adhuc servant theologorum scholae.