Adagiorum Chiliades

IV. 9Saliares dapes.lxxxi

Vetustissimum sacerdotum genus fuit apud Romanos Salii, dicti quod ancilia, quae credebantur coelo delapsa, saltantes ferrent. Hinc opiparum convivium ac magnificum saliare dicitur. Horatius in Odis :

Nunc est bibendum, nunc pede libero

Pulsanda tellus, nunc Saliaribus

Ornare pulvinar deorum

Tempus erat dapibus, sodales.

[Carm., I, 37, 1] Reor autem Horatium saliares pro pontificales dixisse, hoc est speciem pro genere. Nam in omnibus sacris adhibebatur apparatus splendidus ac magnificus, quae cura delegata erat septem viris epulonibus. Aristippus reprehensus, quod homo philosophus sumptuose viveret : Si, inquit, hoc esse crimen, dii non paterentur in suis sacris. De pontificali coena alibi dictum est.