Apud priscos hospitii jus fuisse sanctissimum alias nobis est dictum. Id contrahebatur salis et mensae consortio, quemadmodum apud Germanos acceptus a propinante cyathus adimit omne jus agendi injuriarum. Aeschines De perperam obita legatione : Τοὺς γὰρ τῆς πόλεως ἅλας καὶ τὴν δημοσίαν τράπεζαν περὶ πλείστου δή φησι ποιεῖσθαι, id est Etenim civitatis salem publicamque mensam ait se plurimi facere. Non exciderat hoc proverbium antea commemoratum, verum hoc exemplum hospitii publici religionem nobis commendat eoque commemorandum putavi. Manent hujus hospitalis publicae vestigia in hunc usque diem apud Germanos.