Adagiorum Chiliades

I. 4Surdo canis. Surdo fabulam narras.lxxxvii

Eandem vim habet Κωφῷ ᾄδεις id est Surdo canis. Vergilius in Bucolicis :

Non canimus surdis, respondent omnia silvae.

[Buc., 10, 8] Horatius : Narrare putaret asello / fabellam surdo. [Epist., II, 1, 199] Terentius in Heauton timorumeno : Nae ille haud scit quam mihi nunc surdo narret fabulam. [Heaut., 222] Item T. Livius de bello Macedonico libro X : Quae vereor ne vanis auribus cecinerint. [Hist., XL, 8, 10] Aeschylus in Ἑπτὰ ἐπὶ Θήβαις

Ἤκουσας ἢ οὐκ ἤκουσας; ἢ κωφῇ λέγω;

[Sept. Theb., 202] id est

An audisti, an non audisti ? Num surdo loquor ?

Allusit huc Ovidius Amorum libro III :

Quid juvat ad surdas si cantet Phemius aures ?

Quid miserum Thamyram picta tabella juvat ?

[Am., III, 7, 61] Ortum videtur a ridiculo casu, quo saepe fit, ut hospes incidat in surdum, quem percontetur multa ridentibus iis, qui surdum noverunt.