Qui non opibus tantum aut potentia clarus est, sed ex nobilibus nobilis prognatus est, hunc Cicero subinde domi nobilem vocat. Actione in Verrem tertia : Ignem ex lignis viridibus atque humidis in loco angusto fieri jussit. Ibi hominem ingenuum, domi nobilem, populi Romani socium atque amicum, fumo excruciatum semivivum reliquit. Idem actione quarta : Sopater quidam fuit Halicyensis, homo domi suae cum primis locuples atque honestus. Rursus actione quinta : Itaque cum Pillenus Herbitensis, homo disertus et prudens et domi nobilis. Item Pro Cluentio : Quas literas A. Aurius, vir fortis et experiens et domi nobilis. Rursus Ad Qu. fratrem epistolarum libro secundo M. Orfium equitem Romanum commendat : Hominem domi splendidum, gratiosum etiam extra domum. Conveniet in eum qui suis virtutibus magnus et clarus est.