Non abhorret ab hac forma arcis metaphora, cum tutissimum ac validissimum praesidium significamus. M. Tullius In Verrem actione sexta : Idem ad vos privatim, judices, confugit, utitur hac lege qua judicium est communi arce sociorum. Rursus in eadem : Hic locus est igitur unus quo perfugiant, hic portus, haec arx, haec ara sociorum. Item Pro Roscio comoedo : Haec lex socialis est, hoc jus nationum exterarum est, hanc habent arcem, minus aliquanto munitam quidem quam antea, verum tamen et caetera. Item Pro Sylla : Ego vitam omnium civium, statum orbis terrae, urbem hanc denique, sedem omnium nostrum, arcem regum ac nationum exterarum, lumen gentium, domicilium imperii, quimque hominum amentium ac perditorum poena redemi. Idem in Epistolis familiaribus, scribens P. Lentulo, quod erat in causa praecipuum arcem causae vocat : Non potuit, inquit, magis in arcem causae illius invadere. Aristoteles praefans in Rhetorica ad Alexandrum : Εἰδότας καλῶς, ὡς ἀκρόπολίς ἐστι σωτηρίας ἡ διὰ τοῦ λόγου τοῦ συμφέροντος γινομένη θεωρία, id est Cum pulchre nossent arcem esse salutis utilitatis considerationem quae fit oratione.