IV. 8. Sine canibus et retibus. lxxviii

Ἄνευ κυνῶν τε καὶ λίνων, id est absque canibus et retibus. Hoc quidem schemate Pindarus Nemeorum oda tertia significavit summam celeritatem. Quis enim pedibus assequatur cervos, nisi aut a canibus remorentur aut implicentur retibus ? Conveniet tamen in eos qui clanculariis artibus capiunt praedam. Pindari verba sic habent : Κτείνοντ᾿ ἐλάφους ἄνευ κυνῶν δολίων θ᾿ ἑρκέων, id est Cervos occidentem sine canibus ac dolosis retibus. Dicetur et in eos qui non alienis praesidiis, sed proprio Marte rem gerunt.

Index Adagiorum