Ὥσπερ πηλοφοροῦντες, id est ut lutum bajulantes. Apud Aristophanem in Contionatricibus queruntur feminae populum Atheniensem non convenire ad contionem nisi dato singulis obolo, cum ante suo victu consultarent de republica. Πηλοφορίαν autem posuit pro omnium quaestuariarum artium sordidissima. Apte torquebitur in eos qui functionibus honestis ad abjectum quaestum abutuntur, veluti qui contionantur sacrificant, sepeliunt, ministrant sacramenta, non facturi nisi detur aliquid in manum, ὥσπερ οἱ πηλοφοροῦντες. Nota est sacra historia de Hebraeis apud Aegyptios ἐν πήλῷ καὶ πλύνθῳ servientibus.