IV. 8. In leporinis. xli

Ἐν λαγῴοις, id est in leporinis carnibus vivere dicebantur qui laute atque in deliciis vitam agebant. Nam leporinam olim in deliciis habitam declarat Martialis :

Inter aves turdus, si quis me judice certet,

Inter quadrupedes gloria prima lepus.

Attestatur et proverbium Tute lepus es, et pulpamentum quaeris. Aristophanes in Vespis Sunt inquit mille civitates quae nunc nobis tributum solvunt. Harum unicuique si quis imperet ut viginti alat viros.

Δύο μυριάδες τῶν δημοτικῶν ἔζων ἐν πᾶσι λαγῴοις

Καὶ στεφάνοισιν παντοδαποῖσιν καὶ πύῳ καὶ πυαρίτῃ

id est Viginti milia popularium viverent in omnibus leporinis omnigenisque coronis et pyo et pyarite. Πύον autem Graeci vocant lac quod animal primum reddit a partu et pyariten hinc factam decoctionem. Interpres citat carmen, ex Homero, ni fallor :

Πύον δαινόμενοι κ᾿ ἐμπιμπλάμενοι πυαρίτην,

id est

Epulantes pyo et explentes sese pyarite.

Rursus Aristophanes in Equitibus, cum Cleon et adversarius certatim promittunt lautissimas epulas populo, multis deliciarum generibus nominatis promittuntur et leporinae carnes quasi summae exquisitae deliciae.

Index Adagiorum