Tritissimum est apud eruditos censoriam virgam appellare judicandi auctoritatem, prasertim cum supercilio. A magistratu Romano sumptum. Cujus formae est quod ait beatus Hieronymus in Dialogo adversus Luciferianos : Nemo potest Christi palmam sibi assumere, nemo ante diem judicii de hominibus judicare. Videtur autem Hieronymus allusisse ad caput Deuteronomii vicesimum quintum, ubi justitiae palma dicitur quae a judicibus tradebatur ei qui probasset suam innocentiam causamque vicisset. Hanc palmam vere Christus habet nec eam tradit indigno, quoniam solus judicio non fallitur, cum in humanis judiciis plurimum sit et erroris et caliginis.