IV. 7. In navibus educatus. xcii

Ἐν νηυσὶν τεθραμμένος, id est in navibus educatus, dicebatur qui rudis esset et alienus a moribus liberalibus sensuque communi. Solet enim fere nauticum genus suo elemento respondere, quod a civilium hominum commercio submotum vivat. Ita Plato in Phaedro : Πῶς οὐκ ἂν οἴει αὑτὸν ἡγεῖσθαι ἀκούειν ἐν ναυσί που τεθραμμένων; id est An non putas illum existimaturum sese audire homines in navibus alicubi educatos ? Plautus in Cistellaria mores agrestes appellat maritimos, immo potius inconstantes, quod mare vicibus aestuariis accedat recedatque. Plauti verba sic habent : Ita me Amor lapsum animi ludificat, fugat, agit, appetit, raptat, retinet, jactat, largitur, quod dat non dat, deludit. Modo quod suasit dissuadet, quod dissuasit id ostentat. Maritumis moribus mecum experitur : ita meum frangit amantem animum.

Index Adagiorum