IV. 7. Lunae radiis non maturescit botrus. lxxiii

Plutarchus hunc Ionis senarium ceu proverbialem adfert, disserens quod luna, quoniam radios habet imbecilliores quam sol, excitare possit humores, concoquere non possit :

Μέλας γὰρ αὐταῖς οὐ πεπαίνεται βότρυς,

id est

Neque enim his niger maturus efficitur botrus.

Convenit in eos qui conantur quod ob defectum virium non queunt perficere. Refert idem in commentario De facie apparente in orbe lunae. Accedet plus veneris, si volentes significare disciplinas humanas non praestare felicitatem, dicamus : Μέλας γὰρ αὐταῖς οὐ πεπαίνεται βότρυς. In αὐταῖς subaudiendum est ἀκτῖσιν, id est radiis.