Ὀλέθρου οὐδεὶς λόγος, id est Exitii nulla ratio. Refert Plutarchus in vita Eumenis. Is cum satagens rerum suarum superiorem adisset Phrygiam, intra Celenas hibernavit. Ubi quoniam reperit Alcetam, Polemonem et Docimum de imperio contra ipsum decertantes, Τοῦτ᾿ ἦν᾿ ἔφη τὸ λεγόμενον Ὀλέθρου δὲ οὐδεὶς λόγος, id est Exitii nulla ratio, sentiens, opinor, cum imminet homini fatale exitium, deum adimere consilium ac rationem. Apparet esse hemistichium carminis iambici ὀλέθρου δὲ οὐδεὶς λόγος. Huic affine est quod habet Quintilianus libro V, de conjectura loquens : Praeterea, inquit, cur potissimum illo loco, illo modo sit aggressus, qui et ipse diligentissime tractatur pro eodem locus, an etiam, si nulla ratione ductus est, impetu raptus sit et absque sententia ; nam vulgo dicitur scelera non habere consilium.