Ὑπονόμοις πολεμίζειν, id est cuniculis bellare, dicitur qui non aperta vi, sed dissimulanter ac dolis rem gerit. Contra qui palam agit quod agit machinis agere dicitur. Caii Caesaris potentia jam ad manifestam tyrannidem spectante Catulus Luctatius, vir summae apud Romanos dignitatis, surgens in senatu ait : Οὐκ ἔτι ὑπονόμοις Caesar, ἀλλ᾿ ἤδη μηχαναῖς αἰρεῖ τὴν πολιτείαν, id est Caesar non jam cuniculis, sed machinis tollit rem publicam. Suffossiones clam fiunt, machinae, hoc est arietes, onagri, ballistae, palam admoventur. Dictum Plutarchus refert in vita Caii Caesaris. Plus veneris habebit, si ad res animi transferatur, veluti si quis dicat malos genios interdum oppugnare nos machinis, cum palam terrent aut illectant, interdum cuniculis, quoties falsa specie pietatis imponunt obrepuntque incautis.