Adagiorum Chiliades

IV. 7Jovis lac.liii

Quod insigniter esset lautum in cibis Jovis lac veteres appellabant. Euripidus apud Athenaeum libro XIV :

Καὶ τυρὸς ὀπίας ἐστὶ καὶ Διὸς γάλα,

[Deipn.] id est

Est succulentus caseusque et lac Jovis.

Apud eum frequenter inter ciborum delicias commemoratur Διὸς ἐγκέφαλος, de quo alias diximus. Persae si quid esset exquisite lautum appellabant Διὸς καὶ βασιλέως ἐγκέφαλον, id est Jovis et regis cerebrum , propterea quod rex Persarum solet dare praemium honorarium, si quis novum aliquod edulii genus repperisset. Clearchus apud eundem libro XII quanquam eadem, multis aliis verbis commemorat. Videntur antiqui quicquid eximium videri volebant Jovi tribuisse. Inde illud e satura : Et Jovis auribus ista servas. [Epist., I, 19, 43]