Ἐκ τῶν ὀνύχων ἄρχεσθαι dicuntur qui a levissimis minimeque ad rem pertinentibus ordiuntur. Ita Basilius in epistola quadam : Καταγέλαστόν ἐστιν ἐκ τῶν ὀνύχων ἄρχεσθαι καὶ μὴ αὐταῖς αὐτῶν κεφαλαῖς διαλέγεσθαι, id est Ridiculum est ex unguibus initium sumere ac non potius cum ipsis illorum capitibus colloqui. Caput rei dicitur quod est illius praecipuum. Usus erit, quoties admonebimus ut omissis parergis ac frivolis agatur de causa aut, si quis velit emendare reipublicae statum, ordiatur a principibus potius quam ab humilibus, qui non multum adferunt momenti vel ad perniciem civitatis vel ad salutem.