IV. 7. Quod volumus sanctum est. xvi

Divus Augustinus libro Contra Cresconium grammaticum IV : Non jam, ut vetus proverbium fertur, quod volumus sanctum est, sed etiam quando volumus et quandiu volumus. Alibi, ni fallor, citat ex Ticonio Donatiano. Est hemistichium carminis heroici. Genus hoc hominum hodie regnat in mundo qui pietatem non exigunt ad Christi regulam, sed ad suos affectus, et quicquid vehementer amant, hoc videri volunt etiam sanctum, in rebus natura sceleratissimis sibi mire blandientes. Sanctum autumant gestare tale cingulum. Quamobrem ? Quia parvo negotio cupiunt haberi pro sanctis. At neque sobrie neque caste volunt vivere nec injurias perpeti. Cur ita ? Quia durum est ac difficile.

Index Adagiorum