IV. 7. Flos cinis. xii

Divus Augustinus libro adversus Petiliani literas II, cap. LXVI irridens quod adversarius jactaret quod suorum animabus impletum esset coelum, corporum memoria terrae floruissent, respondit : Sane de corporibus eorum multorum terrarum flores videmus, sed, sicut solet dici, flos cinis. Donatistae suos qui sibi manus attulissent quive provocassent alios ut ab eis occiderentur, ni mallent occidi, in numerum martyrum referebant, eorum monumenta frequentantes, unde flores illos cinerem vocat. Dici solitum videtur in fugacitatem humanae vitae. Hodie floret juventus, cras erit in sepulcro. Et juxta prophetam : Omnis caro foenum.

Index Adagiorum