Athenienses mire delectabantur iis qui risum dictis aut factis movere norunt, adeo ut ad hoc in Diomeo aut Heracleo sexaginta convenirent, qui in civitate nominabantur Sexaginta viri, quemadmodum nos dicimus duumviros, triumviros et decemviros, magistratum significantes, ut, si quid ridicule dictum esset, vulgo ita loquerentur : Οἱ ἑξήκοντα τοῦτο εἶπον, id est Sexaginta viri hoc dixerunt, aut : Ἀπὸ τῶν ἑξήκοντα ἔρχομαι, id est A sexaginta viris venio. Refert Athenaeus libro XIV. Erat Athenis tribus quae dicebatur Διομῶν a Diomo quodam, Colytti filio, unde Διομεῖον ut ex Hesychio licet conjicere. Poterit per ironiam dici in dictum illepidum et agreste : Dictum sexaginta viris dignum aut in stulte dicacem : Hic nobis venit a sexaginta viris.