Adagiorum Chiliades

IV. 6Iracundior Adria.lxxxix

Qui moribus parum est commodis et iritabili ingenio Adriae comparatur proverbio. Ita Flacci amica, quicum fecerat divortium :

Tu levior cortice et improbo

Iracundior Adria

[Carm., III, 9, 21] Ipse fatetur se subiracundo fuisse ingenio :

Irasci celerem, at sic ut placabilis essem.

[Epist., I, 10, 25] Item in satyra cujus initium Jandudum ausculta. Aeschines in Demosthenem dicit eum moribus fuisse adeo asperis et inconstantibus ut cum Adria facilius sit habere commercium quam cum illo ; non quod illud mare sit caeteris saevius — immo vix aliud mitius — sed ita visum est Italis, qui, si navigavissent mare Britannicum aut Danicum, faterentur Adriam indignum esse maris vocabulo.