Idem libro eodem ex perpendiculo dixit pro eo quod erat exacto judicio : Palatinas, inquit, dignitates velut ex quodam tribuens perpendiculo, et sub eo nemo celsum aliquid acturus, in regiam repentinus adhibitus est vel incognitus. Ad hanc formam et illa pertinent quae cum alibi frequenter, tum apud Gellium sunt libro secundo, capite primo : ad amussim exigere et librili perpendere et ad aequilibrium aestimare, et apud Plinium libro XXXVI, capite XXV ad regulam ac libellam exigere, praeterea digitis metiri, trutina pensare, ad unguem facere aliaque quorum nonnulla suis locis indicavimus. Quae omnia plus habent veneris, si ad res animi transferantur. Sumpta metaphora a perpendiculo fabrorum, quo explorant vel aequalitatem soli vel parietis rectitudinem. Amussis est pensilis, in immo plumbum habens affixum ; additur in medio regulae quae constat duobus gnomonibus. Hac explorant aequalitatem soli. M.Tullius In Verrem actione tertia : Tu, Verres, hic quod moliare nihil habes, nisi forte vis ad perpendiculum columnas exigere. Dicunt ei fere nullam columnam quae ad perpendiculum esse possit. Nam Hercle, inquit, sic agamus : columnae ad perpendiculum exigantur et caetera.