IV. 6. Ἴσον ἴσῳ. lxvii

Ἴσον ἴσῳ id est par pari dicebant, ubi quid ex aequo moderatum significant. Sermo ductus a potoribus, qui frequenter de aequalitate disputant, interdum pugnis et ensibus. Sed olim aequalitas erat, ut tantundem adderetur aquae quantum esset vini. Athenaeus libro XI ex Aristophanis fabula cui titulus Philonides citat :

Τοιγαροῦν ἐμοὶ μὲν ἀρτίως ὁ δεσπότης

Δι᾿ ἀρετὴν τῶν Θηρικλείων εὐκύκλωτον ἀσπίδα,

Ὑπεραφρίζουσαν, τρυφῶσαν, ἴσον ἴσῳ κεκραμμένην,

Προσφέρων ἔδωκεν,

id est

Proinde jam nuper meus

In Thericleis mihi virtutis ergo praestitae

Scutum herus pulchre rotundum deferens dono dedit,

Spuma inundans, delicatum, temperatum par pari.

Ex Stratone comico citat hoc carmen :

Ἑρμῆς, ὃν ἕλκουσ᾿ οἱ μὲν ἐκ προχιδίου,

Οἱ δ᾿ ἐκ καδίσκου ἴσον ἴσῳ κεκραμμένου,

id est

Sors, quam trahunt alii quidem e prochidio,

Alii ex cadisco temperato par pari.

Primus trochaicus est imperfectus, et his legendum arbitror Prochoidion ; utrumque vas est vinarium. Ἑρμῆς autem pro sorte ponitur quae prima ducitur, ut alias docuimus. Idem eodem libro refert ex Hermippo :

Ἀπνευστ᾿ ἐκπιὼν

Ὡς ἄν τις ἥδιστ᾿ ἴσον ἴσῳ κεκραμμένον,

id est

Quem spiritu uno exhauseram

Suavissime, contemperatum par pari.

Alibi retulimus par pari, verum non est idem proverbium. Illud de pensatione dicitur, hoc de mixtura aequali. Velut  : Utinam Natura vitam hominum miscuisset ἴσον ἴσῳ ! Nunc nimio plus est mali quam boni. Haec autem verba ἴσον ἴσῳ ponuntur velut absolute, praeter rationem constructionis, quemadmodum dicimus διὰ πασῶν.

Index Adagiorum