Adagiorum Chiliades

IV. 6Nec elephantus ebiberet.lxii

Οὐδ᾿ ἂν ἐλέφας ἐκπίοι, id est Ne elephantus quidem ebiberet. De poculo praegrandi, cum elephantus proboscide immensam aquarum vim cum libet hauriat. Athenaeus libro undecimo citat ex Epinico :

Ἐλέφας ἐλέφαντα περιάγει ῥυτὸν

Χωροῦντα δύο χόας, ὃν οὐδ᾿ ἂν ἐλέφας ἐκπίοι,

id est

Duas choas capientem, ut hunc ne elephas quidem

Ebibere possit.

Rhytos autem poculi genus est, specie cornu, quod videtur eburneum fuisse, impositum imagini elephanti. Subjicit autem : Οὐδὲν ἐλέφαντος γὰρ διαφέρεις οὐδὲ σύ, [Deipn.] id est Nam ne tu quidem quicquam differs ab elephanto, ut esset quadruplex elephanti mentio. Proverbium hoc posterius ante retulimus, hoc loco non citato. Porro choa mensurae genus est. Dicetur in librum insulsum ac loquacem, quem ne patientissimus quidem perlegere sustineat.