Julius Pollux libro X, capite XL docet genus esse retis involutis flexibus sinuosum ac perplexum, quod a Graecis dicatur γαγγάμων a γῶ quod est capio, ut indicat Etymologicus, putans et γαγγάμην appellari, unde et γαγγαμουκούς dici qui piscantur hoc retis genere et γαγγαμεῖς. Aut idem est cum sagena aut simillimum. Pollux citat Aeschylum, qui negotium involutum et explicatu difficile γαγγάμωνα dixerit, quemadmodum dicimus nassam. Unde et ventris locum circa umbilicum γαγγάμωνα dictum, quod illic appareat circumvolutio quaedam nervorum. Fortassis et interior alvus sic appellatur, quod intestina in sese complicentur, ne mox effluant stercora.