IV. 6. In idem conspirare. xlvi

Εἰς ταὐτὸν ξυμφῦσαι, id est in unum coalescere. Plato De legibus IV : Τὸ δὲ συμπνεῦσαι καὶ καθάπερ ἱππέων ζεῦγος καθ᾿ ἕνα εἰς ταὐτόν, τὸ λεγόμενον, ξυμφῦσαι χρόνου πολλοῦ καὶ παγχάλεπον, id est Caeterum conspirare ac velut equitum jugum singulos in idem, ut dici solet, coalescere multo eget tempore estque perdifficile. Interpres ξυμφῦσαι vertit unum et idem efflare, cum magis videatur dictum a φύω, nascor. Itaque mihi magis arrisit coalescendi verbum. Quanquam hujus rei judicium doctis defero. Si jungas duos equos inter se ignotos, non ferunt sese. Tandem assuetudine diutina, posteaquam uterque alterius halitui assueverit, concordes sunt. Itaque pariter anhelasse sub eodem jugo gignit concordiam. Et Vergilius ait : Udoque docent inolescere libro.

Index Adagiorum