Narrant locum fuisse vicinum Hymetto, cui nomen fuerit Κυλλοῦ Πήρα, id est Claudi Mantica. In eo fuisse templum simulque fontem, unde feminae steriles bibebant et fiebant fecundae. Suidas indicat et composite dici Κυλλοπήραν, admonens esse proverbium in eos qui artificio vim admovent naturae. Hesychius ostendit Aristophanem in Centauro lupanar appellasse Κυλλοῦ Πήραν, quod hujus nominis locus declivis sit ac praeceps. Conveniet in illos qui bulbis aliisve medicamentis irritant libidinem. Quidam elleboro succurrunt ingenio et quibusdam medicaminibus memoriae.