Adagiorum Chiliades

IV. 5Decipienti semel.lxii

Suspicor esse vulgo jactatum apud Italos quod refert Joannes Campanus, vir suo seculo magnus et admirabilis ingenii, libro De fugienda ingratitudine secundo  : Decipienti me semel, dii male faxint, faxintque bene, si bis idem deceperit. [De ingratitudine fugienda, Mayence, 1532, II, p. 133] Quod semel falli perfidiae decipientis par sit imputari, verum qui semel expertus rursum fidem habuerit eidem, dignus videatur qui fallatur. Confine est illi quod alibi recensuimus :

Improbe Neptunum accusat, qui iterum naufragium facit.

[Mim., 1] Quoniam Campanus erat variae reconditaeque lectionis, fieri potest ut hoc dictum alicubi citatum legerit. Nam videntur esse duo senarii pauculis immutatis :

Decipienti semel me, dii faxint male.

Faxintque bene, si bis idem deceperit.

Nam ipse Campanus adducit titulo veteris proverbii, quanquam vetus dici potest quod nostra quoque memoria natum est.