IV. 5Etiam si Cato dicat.lxi
Plutarchus in Vita Catonis narrat tantam Catonis apud populum fuisse fidem et auctoritatem, ut de rebus incredibilibus proverbio diceretur : Τοῦτο μὲν οὐδὲ Κάτωνος λέγοντος πιθανόν ἐστιν, [Vit. Cat.] id est Istuc incredibile est, etiam si dicat Cato. Et orator quidam, cum hyperbolicos diceret uni testi non esse credendum, adjecit ne Catoni quidem. M. Tullius epistola ad Atticum, libro secundo : Quid Cato ille noster, qui mihi unus est pro centum milibus. [Att.] Similis erat auctoritas Aristidis apud Athenienses ac Xenocratis, cui uni populus remisit jusjurandum, cum alioqui nullus illic testis admitteretur absque jurejurando. Huic affine est : Nec jurato istuc crediturus sim.