Certe speciem habet proverbii, quod refert Tertullianus in libello De pallio : Haec nimirum indignitas erit a toga ad pallium. Cujus duplex erit usus, vel cum ad diversum vitae genus sese contulerit aliquis, vel cum a fortuna honestiore ad humiliorem, velut si quis ex aulico fiat monachus aut e praefecto paedagogus, e consule rhetor. Toga Romanorum erat, pallium Graecorum. Post pallium coepit esse gestamen philosophorum. Confine illi : Ab equis ad asinos.