Apparet Soterichi lecti in vulgarem jocum abiisse de re vili priscaque et minime ambitiosa et rudis artificii. Sic enim Seneca Ennianos de Cethego versus irridens : Qui hujusmodi versus amant, inquit, liceat sibi et eosdem admirari et Soterichi lectos. Aulus Gellius, nam ab hoc illa referuntur, libro duodecimo, capite secundo : Dignus sane Seneca videatur lectione ac studio adulescentium, qui honorem et colorem veteris orationis Soterichi lectis compararit, quasi minimae scilicet gratiae et relictis jam contemptisque. Conjicere licet Soterichum fabrum fuisse quempiam, cujus opera priscam illam et rudem simplicitatem prae se tulerint. Nam Romae postea argentea triclinia divitibus in usu fuisse testatur Plinius libro tricesimo tertio, capite undecimo. Hujusmodi inter pictores fuisse Fulvium, Rutubam et Placidianum in Sermonibus indicat Horatius :
Proelia rubrica picta aut carbone ?Vel cum Pausiaca torpes, insane, tabella,
Qui peccas minus atque ego, cum Fulvi Rutubaeque
Aut Placideiani contento poplite miror