Non tam ovum ovo simile quam illud proverbii faciem prae se fert, quod refertur a Plutarcho in commentario De dignoscendo adulatore ab amico : Εὐδίᾳ γὰρ ἐπάγει νέφος, id est Serenitati nubem inducit. De eo qui inter pocula ludosque virulentum aliquid admiscet, quod offuscata hilaritate frontem corruget superciliaque contrahat. Ad eundem modum Horatius libro III, Ode XV, de anu deformi quae se puellarum choris admiscebat :
Et stellis nebulam spargere candidis.