IV. 4. Isthmum perfodere. xxvi

Isthmum perfodere dicebantur qui magno quidem conatu, sed irrito, molirentur aliquid. Ductum ab Isthmo Corinthiaco, qui efficiebat ut naves longo et ancipiti ambitu juxta peninsulam circumagerentur. Unde complures illum adorti sunt, qua erat angustissimus, perfodere, nempe Demetrius rex, dictator Caesar, Caius princeps, Domitius Nero, infausto, ut omnium patuit exitu, incepto. Auctor Plinius, libro quarto, capite quarto. Tranquillus ostendit idem tentatum a Caligula. Philostratus in Vita Apollonii negat Neronem destitisse victum operis difficultate, sed quod timeret ne admissum mare perituram Aeginam portenderet aut res novas in imperio Romano coorituras ; nam id praedixerant Aegyptii vates. Quin et vetustissimus scriptor Herodotus libro Historiae suae primo prodidit Cnidios isthmum qua angustissimo spacio, nempe quimque stadiorum, spectabat continentem, perfodere adortos, quo insulam facerent ; caeterum ictos scopulos in fodentium oculos resiliisse, deinde Delphicum Apollinem ab eis consultum trimetris respondisse :

Ἰσθμὸν δὲ μὴ πυργοῦτε μηδ᾿ ὀρύσσετε· Ζεὺς γὰρ κ᾿ ἔθηκε νῆσον, εἴ κ᾿ ἐβούλετο,

id est

Neque cingite Isthmum moenibus neque fodite.

Nam si Jovi id visum, locasset in salo.

Denique Nicanor Seleucus aggressus est isthmum, qui dirimit Euxinum et Caspium mare, nec perfecit, a Ptolemaeo Cerauno interfectus.

Index Adagiorum